Тәуелсіз Қазақстанның тарихи тамыры тереңде жатқаны мәлім. Соның ішінде Қазақ Автономиялы Кеңестік Социалистік Республикасының құрылуы ел тарихындағы негізгі оқиғалардың бірі болып табылады. Биыл оның құрылғанына және Қазақ жерінің шекаралық аумағы бекітілгеніне 100 жыл толып отыр.

Осыған орай, Қарағанды облысы «Рухани жаңғыру» өңірлік жобалық кеңсесі мен Академик Е.А. Бөкетов атындағы Қарағанды университеті ұйымдастыруымен «Қазақ Автономиялы Кеңестік Социалистік Республикасы» туралы тарихи декреттің қабылданғанына 100 жыл! Жер тұтастығына тұтқа болған қайраткерлер» атты республикалық конференция өтті.

Алқалы басқосуға облыс әкімінің орынбасары Абзал Нүкен, ҚР ҰҒА академигі, тарих ғылымдарының докторы, Алаштанушы Мәмбет Қойгелді, жазушы Тұрсын Жұртбай, ф.ғ.д., профессор, ҚР БҒМ М.О.Әуезов атындағы Әдебиет және өнер институтының бас ғылыми қызметкері Айгүл Ісімақова, «Тұлғатану» ғылыми-зерттеу орталығының директоры, т.ғ.к., профессор, облыстық ҚХА ҒСТ мүшесі Нұрсахан Бейсенбекова т.б. тарихшылар, басқарма басшылары, облыстық ҚХА мүшелері, қоғам белсенділері және БАҚ өкілдері, барлығы 80-ге жуық адам қатысты.

Ұлтымыздың ұлы жолы, талайлы тағдыры, бай тарихы, бабалар өмірі, елдігіміз үшін күрескен ірі тұлғаларымыздың ғибратты ғұмыры тәуелсіз еліміздің баға жетпес құндылығы. Осынау құндылықтарымызды түгендеу, бабалар жолын жаңғыртып, оларға тағзым ету, құрмет көрсету бүгінгі ұрпақтың басты парызы, сондай-ақ ертеңге үлгі ретінде ұсынар ізгі амалы. Бүгінгі конференция соны мақсат етеді.

Кейін қарай